Борбордук Азиядагы Америка Университети - БААУ - “Борбордук Азияны изилдөө” магистрдик программасы

“Борбордук Азияны изилдөө” магистрдик программасы

“Борбордук Азияны изилдөө” магистрдик программасы Борбордук Азиянын өткөн мезгилдеги жана учурдагы коомдук, саясий, экономикалык жана маданий процесстер жөнүндө түшүнүк берүү, чөлкөм жөнүндөгү билимди түзгөн көптөгөн окуу дисциплиналарынын методологиясына жана аналитикасына жалпы сереп салуу үчүн иштеп чыгарылган

Бул магистрдик программанын бүтүрүүчүсү Борбордук Азия жөнүндөгү бар болгон же келечекте табыла турган маалыматтарды талдоо, баалоо жана ой жүгүртүү жөндөмдүүлүктөрүн көрсөтүшү жана көз карандысыз түрдө илимий изилдөө жүргүзүүгө же адистиги боюнча иштөөгө мүмкүнчүлүк берген даражада жергиликтүү тилди жакшы билиши талап кылынат. Бул интерактивдүү магистрдик программа өз студенттерине үйрөнүүдөн тажрыйбага, жана тажрыйбадан үйрөнүүгө карай өтүү мүмкүнчүлүгүн берет.

Ошондой эле, программанын бүтүрүүчүлөрү Борбордук Азияны изилдеген коомдук илимдер боюнча докторлук (PhD) программаларына кирүү үчүн даярдык алышат же болбосо мамлекеттик кызмат, дипломатия, эл аралык уюмдар, илим, журналистика сыяктуу, жергиликтүү тилдерди билүүнү жана башка квалификацияларды талап кылган тармактарда иштей алышат.

Программаны Борбордук Азиядагы Америка университетинин Борбордук Азияны изилдөө институту (Central Asian Studies Institute (CASI)) жетектейт. БААУ америкалык гуманитардык билим берүү салтында иш жүргүзгөн эл аралык, мультидисциплинардык окуу жайы болуп саналат. Университет курулган 1993-жылдан бери өзүнүн бөтөнчөлүгүн интеллектуалдык эркиндикке жана критикалык ой жүгүртүүгө дем берүү жана ишке ашыруу менен далилдеп келе жатат. Өзүнүн жайгашкан жери, саны улам өсүп бара жаткан эл аралык профессордук-окутуучулук курамы жана студенттик/аспиранттык коомчулугу аркылуу, БААУ чөлкөмдөгү жогорку сапаттуу билим берген жана илимий изилдөөлөрдү жүргүзгөн университет жана Борбордук Азияны изилдөөдө алдыңкы катарды ээлеген борбор болууга умтулат. Бул максат менен, БААУ Борбордук Азияны изилдөө институтун 2011-жылы түзгөн. Жергиликтүү жана чет өлкөлүк окумуштуулардын башын бириктирип, студенттер, окутуучулар жана конок профессорлордун арасында жемиштүү кызматташтыкты түзүп, мультидисциплинардык жана салыштырмалуу изилдөө долбоорлоруна артыкчылык берүү менен Борбордук Азияны изилдөө институту Борбордук Азия республикаларында (Казакстан, Кыргызстан, Тажикстан, Түркмөнстан жана Өзбекстан), чектеш чөлкөмдөрдө жүрүп жаткан процесстер жөнүндө эң жаңы жана жоопкерчиликтүү билимди жаратууну көздөйт. Магистратурага тапшырган студенттер жигердүү илимий коомчулукка кошулуп, ар түрдүү жолугушуу, конференция, лекция, семинарларга катышуу менен атайын чакырылган мартабалуу окумуштуулар, саясий ишмерлер жана эксперттер менен байланыш түзүүгө мүмкүнчүлүк алышат.

Кошумча суроолорду Айгүл Каныбековага (Aigul Kanybekova (kanybekova_ai@auca.kg) берсе болот.

Борбордук Азиядагы Америка университети
Аалы Токомбаев көчөсү 7/6
Бишкек, Кыргыз Республикасы 720060

Тел.: +996 (312) 915000 + ички.
Факс: +996 (312) 915 028