Кембридж университетинин басмасы БААУда

12 июня 2024

#Тимоти О’Коннор#Президент#китепкана#библиотека#President#library

2024-жылдын 7-июнунда БААУнун президенти Тимоти О'Коннор жана китепкананын жетекчиси Жылдыз Бекбалаева Кембридж университетинин басмасынын сатуу боюнча аймактык менеджери Лежек Жервински менен жолугушту. Жолугушууда өлкөдөгү академиялык коомчулук үчүн электрондук ресурстарды жана басып чыгаруу мүмкүнчүлүктөрүн илгерилетүү боюнча потенциалдуу кызматташуу талкууланды.

БААУ мүчө болгон EIFL Эл аралык китепкана консорциуму (www.eifl.net) менен Кембридж университетинин басылмасынын ортосундагы макулдашуунун алкагында Cambridge Journals Online (https://www.cambridge.org/core) сайтында жайгашкан көп тармактуу 411 алдыңкы журналдардын жыйнактарына Кыргызстандагы билим берүү мекемелери 90% дан ашык арзандатуу менен жеткиликтүүлүккө ээ боло алышат.Бул билимдүү жана кесипкөй коомчулук тарабынан жарыяланган 200дөн ашуун журналдарды камтыйт. Мындан тышкары, Кембридж университетинин басмасы Кыргызстандын авторлору өздөрүнүн илимий макалаларын ачык жеткиликтүүлүктөгү жана гибриддик журналдарда чыгарып жаткан учурда, макалаларды басып чыгуу акысынан (APC) баш тартууну сунуш кылат.

Президент О’Коннор, келечектеги кызматташууга абдан кызыкдар экенин билдирип, БААУ жана Кыргызстандын бардык билим берүү коомчулугуна пайда алып келе турган академиялык ресурстарды жана өнөктөштүктү өнүктүрүүнүн маанилүүлүгүн баса белгиледи.

Cambridge University Press басылмасына жазылуулар жана басып чыгаруу мүмкүнчүлүктөрү жөнүндө көбүрөөк маалыматты бул жерден тапсаңыздар болот: https://www.eifl.net/apcs/cambridge-university-press-apcs-open-access-publishing.

Суроолор боюнча БААУнун китепканасынын электрондук дарегине кайрылууга болот. library@auca.kg

<<